Wiehnachts-Fänschter Reutigen 2024

D Wiehnachtsfänschter in Reutigen/Zwieselberg/Hani finde o im 2024 wieder statt.

Sie söue chli Liecht i ds Dorf bringe.

E Müglechkeit, sich ds träffe.

Ds Mami, wo mau us der Chuchi chunnt.

Der Päpu, wo nachem Schaffe der Chopf cha verlüfte.

Der Hundespaziergang, wo me grad dermit cha verbinde.

D Teenies, wo sech no schnäu ihri täglechi Bewegig chöi hole.

Der inner "Schweinehund" überwinde, u no hurti a d Chälti use.

Was mer ganz wichtig isch:

Es längt scho es Cherzli u es Nümmerli.

Wär eh scho e schöni Belüüchtig macht,

dä cha eifach no es Nummero häre tue - that's it.
Mir fröie nis natürlech o uf ganz kreativi "Fänschter" - alles isch müglech.

Dir entscheidet säuber, ob mir när eifach dörfe cho aaluege 

oder ob dir no öppis wettet offeriere (dinne oder dusse).

D Zyte bestimmet dir so, dass es für öich passt.

U wie wärs de, wenn jedes grad sis eigete Tassli mitnimmt?

Wenig Ufwand für öich u viel Zyt gspart für die, wo öppis usschänke.

Der Kaländer, wo dir öich dörft iitrage, isch gly hie uf dere Syte.

Mir isches wichtig, dass mer d Aaläss, wo im Dezämber im Dorf stattfinde,

grad i d Wiehnachtsfänschter integriere. Drum si die folgende Date scho fix vergäh:

1. Dezämber: Turnvorstellig TV ir Turnhalle/Singsaal Reutigen
2. Dezämber: Gmeindsversammlig im Singsaal Reutigen
6. Dezämber: Chlouseaabe Ortsteil Reutigen, Schulhausplatz
6. Dezämber: Chlouseaabe Ortsteil Zwieselberg, Egg

14. Dezämber: Adventskonzert ir Chiuche Reutigen

24. Dezämber: Familien Christnacht-Fiir ir Chiuche Reutigen

Wenn der Frage heit, mäudet nech ungeniert bi mir:

Karin Simon (die mit de Schlittehünd)
hej@schweden-kafi.ch, 079 251 34 57